گناہوں میں مبتلاء شخص گناہ سے بچنے کے لیے کیا کرے؟

مذکورہ حالات میں والدین کو چاہیے کہ جلد از جلد مناسب رشتہ دیکھ کر آپ کی شادی کروادیں، بصورت دیگر آپ سے کوئی گناہ سرزد ہونے کی صورت میں گناہ کا عذاب آپ کے ساتھ ساتھ والدین کو بھی ہوگا، اور جب تک شادی نہیں ہوجاتی، تب تک آپ مندرجہ ذیل باتوں پر عمل کرتے رہیں:

(1) نظروں کی حفاظت کریں۔

(2) نامحرم اور اجبنی عورتوں کے ساتھ اختلاط سے بچیں۔

(3) روزے رکھیں، کیونکہ روزہ رکھنے سے شہوت مغلوب ہوتی ہے۔

(4) ایسی غذائیں استعمال نہ کریں، جس سے شہوت میں اضافہ ہوتا ہو۔

(5) غلط ماحول اور خیالات سے بچنے کی حتی المقدور کوشش کریں، اپنے آپ کو مصروف رکھیں، حتی الامکان تنہائی سے احتراز کریں، اور جہاں تنہائی ناگزیر ہو، وہاں کم سے کم وقت گزارنے کی عادت اور ترتیب بنائیں۔

(6) کسی بزرگ سے بیعت کرنے یا تبلیغی جماعت میں کچھ وقت لگانے کی کوشش کریں اور اپنا اٹھنا بیٹھنا نیک لوگوں کے ساتھ رکھیں۔

امید ہے ان چیزوں پر عمل کرنے کی وجہ سے اللہ پاک آپ کی شیطان کے مکر و فریب سے حفاظت فرمائیں گے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
دلائل:

کذا فی المشکوۃ المصابیح:

عن أبی سعید وابن عباس رضی الله عنھما قالا: قال رسول الله صلی الله علیہ وسلم: من ولد لہ ولد فلیحسن اسمہ وأدبہ، فاذا بلغ فلیزوجہ، فان بلغ ولم یزوجہ فأصاب اثمًا فانما اثمہ علٰی أبیہ۔“

(باب الولی فی النکاح واستئذان المرأة، الفصل الثالث، رقم الحدیث 3138، ج3، ص191، مکتبۃ البشری، کراچی)


کذا فی الصحیح البخاری:

عن عبد اللّٰہ بن مسعود رضي اللّٰہ عنہ قال: کنا مع النبي صلی اللّٰہ علیہ وسلم شبابًا لا نجدُ شیئًا،فقال لنا رسول اللّٰہ صلی اللّٰہ علیہ وسلم: یا معشر الشباب! من استطاع منکم الباء ۃ فلیتزوج؛ فإنہ أغض للبصر وأحصن للفَرَجِ، ومن لم یستطع فعلیہ بالصوم؛ فإنہ لہ وجاء۔

(کتاب النکاح، باب من لم یستطع الباءۃ فلیصم رقم الحدیث 5066، ج3، ص363، دار الکتب العلمیہ، بیروت)

لما فی الشامیۃ:

فإن تیقن الزنا إلا بہ فرض ’’نہایۃ‘‘ أي: بأن کان لا یمکنہ الاحتراز عن الزنا إلا بہ؛ لأن ما لا یتوصل إلی ترک الحرام إلا بہ یکون فرضاً، وہٰذا إن ملک المہر والنفقۃ۔

(کتاب النکاح، مطلب کثیرًا ما یتساہل في إطلاق المستحب علی السنۃ، ج3، ص 79، سعید، کراچی)

واللہ تعالٰی اعلم بالصواب
دارالافتاء الاخلاص، کراچی