ہبہ سے متعلق چند سوالات

واضح رہے کہ گھر جائیداد وغیرہ کسی کےمحض نام کر دینے سے یا صرف کہنے سےشرعاً وہ اس کا مالک نہیں بنتا  جب تک اس کو کامل قبضہ اور اس میں تصرف کا اختیار نہ دیا گیا ہو ،لہذا مذکورہ گھر سسر کی ملکیت میں تھا اور ان کے انتقال کے بعد ان کے ورثاء میں تقسیم ہوگا، البتہ سسر کے بیٹے  جو سسر کی زندگی میں مزید ایک منزل تعمیر کی بیٹۓ کو اس تعمیر کا خرچہ ملے گا باقی رقم تمام ورثاء میں شریعت کے مطابق تقسیم ہوگی، بیٹۓ کا اندازے سے تقسیم کرنا درست نہیں،لیکن اگر بہنیں اس تقسیم پر راضی ہوں تو باہمی رضامندی سے اس طرح تقسیم کیا جاسکتا ہے۔

بہو کو گاڑی کے کاغذات اور چابی حوالے کرنے سے وہ بہو کی ملکیت میں آگئی ہے وہ سسر مرحوم کی میراث میں تقسیم نہیں ہوگی، باقی اگر یہ عام شیئرز ہیں تو صرف دوست کویہ  کہ دینے سے کہ یہ میری بیٹی کو دینے ہیں شرعاً وہ سسر کی ملکیت میں ہیں جو ان کے انتقال کے بعد ان کے ورثاء میں تقسیم ہوں گے۔

فتح القدیر میں ہے:

"(وتصح بالإیجاب و القبول و القبض) أما الإیجاب و القبول فإنه عقد والعقد ینعقد بالایجاب والقبول والقبض لا بد منه لثبوت الملك .... و لنا قوله علیه صلی اللہ علیه وسلم: لاتجوز الهبة إلا مقبوضة.

قال العلامه ابن الهمام:

قال صاحب النهایة ای تصح بالایجاب وحدہ فی حق الواھب، وبالایجاب والقبول فی حق الموھوب له  .... ولکن لا یملکه الموھوب له الا بالقبول والقبض."

(کتاب الهبة، ص/479، 480، 481 ج/7 ، ط/رشیدیه)

جامع الفصولین میں ہے:

"وقد مر في (كد) ان الزوج لو عمر دارها باذنها فالنفقة دين عليها ولم يذك انه شرط الرجوع۔ (ذ) الأصل ان من بني في دار غيره بامره فالبناء لرب الدار ويرجع عليه بما انفق."

(احکام العمارۃ فی ملک الغیر، ص:160، ج:2، ط:اسلامی کتب خانه)

فتاوی شامی میں ہے:

"(ولها بلا إذنها فالعمارة لها وهو متطوع) في البناء فلا رجوع له

وفی الرد: ولو بنى لرب الأرض، بلا أمره ينبغي أن يكون متبرعا كما مر اهـ."

(مسائل شتي، ص:747، ج:6، ط:سعید)

مرحوم سسر کے ترکہ کی تقسیم کا شرعی طریقہ یہ ہے کہ کل ترکہ میں سے سب سے پہلے ان کی تجہیز و تکفین کے اخراجات نکالے جائیں، اس کے بعد اگر ان پر کوئی قرضہ ہو تو اسے ادا کیا جائے،پھر اگر انہوں نے کوئی جائز وصیت کی ہو تو باقی ماندہ ترکہ کے ایک تہائی سے اسے نافذکیا جائے، اس کے بعد باقی  جائیداد منقولہ وغیر منقولہ کے5 حصے بناکر مرحوم کے بیٹے کو 2 حصے ہر بیٹی کو ایک ایک حصہ ملے گا۔

صورتِ تقسیم یہ ہے

میت 5

بیٹا	بیٹی	بیٹی	بیٹی
2	1	1	1

یعنی فیصد کے اعتبار سے مرحوم کے بیٹے کو 40 فیصد ہر بیٹی کو 20 فیصد ملے گا۔

نوٹ: یہ تقسیم اس وقت ہے جب سسر کے صرف یہی ورثاء ہوں، اگر کوئی اور وارث ہو اس کی تفصیل بتاکر  دار الافتاء سے دوبارہ رجوع کیا جاسکتا ہے۔

فقط واللہ اعلم