سوال کا متن:
آج کل موبائل میں قرآن پاک انسٹال ہو جاتے ہیں۔ سوال یہ ہے کہ موبائل پر تلاوت کرنا کیسا ہے؟ قرآن پاک پر تلاوت کرنے اور موبائل پر تلاوت کرنے میں ثواب میں کوئی فرق آئے گا کیا؟ کیا موبائل پر تلاوت بغیر وضو کے جائز ہے؟
جواب کا متن:
موبائل میں دیکھ کر تلاوت کرنا جائز ہے، مصحف (قرآنِ پاک ) میں دیکھ کر تلاوت کرنا موبائل میں دیکھ کر تلاوت کرنے کے مقابلے میں زیادہ باعث برکت ہے، کیوں کہ مصحف شریف کو ہاتھوں میں ادب واحترام سے پکڑنے کی فضیلت موبائل میں حاصل نہیں ہوتی، البتہ نفسِ تلاوت کے ثواب میں کوئی فرق نہیں آئے گا۔
وضو کے بغیر قرآنِ کریم کی تلاو ت جائز ہے، لیکن قرآنِ کریم کو ہاتھ لگانا جائز نہیں ہے، اس لیے موبائل کی اسکرین پر اگر قرآن کریم کھلا ہوا ہو تو اسکرین کو وضو کے بغیر چھونا جائز نہیں ہے ، اس کے علاوہ موبائل کے دیگر حصوں کو مختلف اطراف سے چھونا جائز ہے۔ فقط واللہ اعلم