کپڑا دھونے اور پاك كرنے كا صحیح طریقہ كیا ہے؟

بسم الله الرحمن الرحيم
Fatwa:1035-895/L=10/1440
کپڑے میں جو نجاست لگی ہے اگر وہ دکھائی دینے والی نجاست نہیں ہے یعنی ذی جرم؛ دَلدار نہیں ہے جیسے پیشاب وغیرہ تو کپڑے کو تین مرتبہ دھویا جائے، اور ہرمرتبہ اس کو نچوڑدیا جائے اور تیسری مرتبہ اپنی طاقت بھر خوب زور سے نچوڑدیا جائے کہ پانی کا ٹپکنا بند ہوجائے۔ اور اگر کپڑے میں لگی ہوئی نجاست دکھائی دینے والی ہے، جیسے: پاخانہ وغیرہ تو کپڑے کو اتنا دھویا جائے کہ نجاست کی ذات زائل ہوجائے، خواہ اس کے لیے کپڑے کو کتنی ہی دفعہ دھونا پڑے، البتہ اگر تین سے کم میں نجاست زائل ہوجائے تو کپڑے کو مکمل تین دفعہ دھولینا بہتر ہے۔
واللہ تعالیٰ اعلم
دارالافتاء،
دارالعلوم دیوبند